Патниците кои денеска се упатуваат кон Грција треба да бидат подготвени за подолги задржувања на граничните премини поради предупредувачкиот штрајк на грчките царински службеници.
Штрајкот се одржува од 05:00 до 09:00 часот по македонско време и ги опфаќа сите три гранични премини меѓу Македонија и Грција – Евзони кај Богородица, Ники кај Меџитлија и Дојран.
За време на протестната акција, патничките возила се пропуштаат во интервали од по десет минути, што предизвикува забавен проток на сообраќајот и можност за создавање колони.
Товарниот сообраќај е целосно запрен. Камионите и другите товарни возила не можат да влезат или да излезат од Грција додека трае штрајкот.
Грчките царински службеници преку протестот бараат подобрување на условите за работа и исплата на додатоци за прекувремена работа, сменска работа, како и ангажмани за време на празници и викенди.
Според нивните најави, станува збор за предупредувачки штрајк кој се спроведува на сите копнени гранични премини во Грција.
Од Министерството за внатрешни работи информираа дека македонските гранични служби работат непречено и според редовните процедури. Од таму посочуваат дека се обезбедени сите потребни човечки и технички ресурси, а евентуалните задржувања зависат исклучиво од работата на грчките гранични служби.
Граѓаните се повикуваат на трпение и, доколку имаат можност, патувањето да го прилагодат по завршувањето на штрајкот за да избегнат подолги чекања.
