Македонскиот вицепрвак Шкендија го заврши настапот на европската фудбалска сцена, откако не успеа да го елиминира шкотскиот Хибернијан во третото квалификациско коло од Конференциската лига.
По поразот од 1-2 на првиот натпревар во Шкотска, тетовци вечерва во реваншот во Скопје одиграа 0-0, резултат кој беше доволен за Хибернијан да обезбеди пласман во следната рунда.
Шкендија уште од самиот почеток тргна офанзивно и се обиде што побрзо да стигне до гол. Во третата минута Круезиу шутираше од работ на шеснаесетникот, но топката за малку заврши покрај голот. Истиот фудбалер се обиде и во 26. минута од далечина, но ударот беше непрецизен.
Тоа беше практично сè што успеа да создаде Шкендија во првото полувреме.
Слична беше сликата и во продолжението. Тетовци имаа поголема иницијатива и постојано се обидуваа да го загрозат голот на гостите, но недостигаше конкретна завршница.
Хибернијан, пак, во вториот дел имаше две одлични можности да го реши натпреварот. Сепак, голманот Рамни беше на висина на задачата и во двата наврати спречи сигурен погодок. Во 65. минута Нзенгуе се обиде да го промени резултатот, но и неговиот удар заврши покрај голот.
Со елиминацијата на Шкендија, Македонија остана без претставник во европските фудбалски натпреварувања.
Претходно од Конференциската лига беа елиминирани Силекс и Вардар, кој настапот во Европа го започна во квалификациите за Лигата на шампионите.
