Вкупно 15 пожари на отворен простор се регистрирани во земјава до 18 часот, информира Центарот за управување со кризи (ЦУК). Од нив, шест пожари се активни, два се ставени под контрола, додека седум се целосно изгаснати.
Активни пожари се регистрирани на повеќе локации низ земјава. Во Општина Македонски Брод гори кај местото Видуш, во близина на селото Драгов Дол, каде што огнот зафатил ниска вегетација, нискостеблеста шума и грмушки.
Пожар има и во Општина Струга, кај селото Долна Белица, каде гори ниска вегетација. Во Општина Центар Жупа, кај селото Плареник, огнот зафатил сува трева и нискостеблеста шума.
Во Општина Кичево, во близина на турските гробишта, гори ниска вегетација и стрниште, додека активни се и пожарите во Општина Битола, кај селото Букри, каде гори ниска вегетација, како и во Општина Долнени, кај селото Житоше.
Два пожари се ставени под контрола. Во Општина Крива Паланка пожарот бил регистриран на излезот од градот, каде што горела депонија, додека во Општина Делчево огнот зафатил дел од градската депонија.
Во текот на денот биле изгаснати уште седум пожари. Во Општина Новаци пожарот бил регистриран на патот пред РЕК Битола, каде горела ниска вегетација. Изгаснат е и пожарот во Општина Велес, кај местото Кулата, каде што гореле нискостеблеста поретка шума и ниска вегетација.
Без активен пожар остануваат и локациите во Општина Босилово, помеѓу селата Турново и Секирник, каде горело стрниште, како и во Општина Штип, кај селото Лакавица, каде огнот зафатил ниска вегетација и грмушки.
ЦУК информира дека се изгаснати и пожарите во Општина Градско, покрај компанијата „Жито Вардар“, каде горела ниска вегетација, во Општина Неготино, кај воениот полигон Криволак, како и во Општина Арачиново, кај селото Арачиново, каде горела депонија.
Надлежните служби продолжуваат со следење на состојбата на местата каде што пожарите се активни и под контрола, со цел да се спречи нивно повторно разгорување и понатамошно ширење.
