Севастопол на Крим повторно остана без електрична енергија по масовен украински напад со беспилотни летала, соопштија руските власти. Гувернерот на Севастопол поставен од Москва, Михаил Развожаев, изјави дека прекинот во снабдувањето со струја бил предизвикан од нападот. Според него, руските сили за противвоздушна одбрана биле активирани за пресретнување на украинските дронови.
Стручните екипи се на терен и ги проценуваат размерите на штетата врз електроенергетската инфраструктура. Украина во изминатиот период ги засили нападите со беспилотни летала врз воени и други стратешки цели на Крим и на руска територија.
Киев наведува дека целта на нападите врз енергетската и воената инфраструктура е да се наруши снабдувањето на руските сили и да се намалат приходите со кои Москва ја финансира војната. Крим е под руска контрола од 2014 година, но Украина и најголемиот дел од меѓународната заедница го сметаат полуостровот за украинска територија.
