Македонската фудбалска репрезентација ги продолжува подготовките за натпреварот против Шкотска во третото коло од Лигата на нации, во обид да стави крај на резултатската криза по двата порази на стартот од натпреварувањето.
По неуспесите против Швајцарија и Словенија, селекторот Гоце Седлоски изјави дека ја презема целосната одговорност за резултатите и побара критиките да бидат насочени кон него и кон Фудбалската федерација, а не кон репрезентативците.
„Критиките нека бидат насочени кон мене и кон федерацијата, а не кон играчите. Тимот е во процес на подмладување и стабилизација и за тоа е потребно трпение. Продолжуваме да работиме со цел да создадеме нова генерација фудбалери“, изјави Седлоски.
За дуелот со Шкотска, селекторот најави две до три промени во почетниот состав, со цел да внесе свежина во екипата и подобро да одговори на физичките барања во овој репрезентативен циклус.
„Против Шкотска нема да се браниме. Ќе се обидеме да го наметнеме нашиот стил на игра. Подготвени сме да покажеме карактер, како што беше случајот против Словенија, иако резултатот тогаш изостана“, додаде македонскиот селектор.
Натпреварот меѓу Македонија и Шкотска ќе се одигра утре на Националната арена „Тодор Проески“ во Скопје, со почеток во 20:45 часот. Македонската репрезентација ќе се обиде да ја прекине серијата од шест натпревари без постигнат гол и да стигне до позитивен резултат пред домашната публика.
