Два историски објекти во центарот на Скопје, поранешните хотели „Бристол“ и „Јадран“, одат на продажба откако Собранието на акционери на „Македонијатурист“ на 22 мај ја одобрило продажбата на дел од недвижниот имот на компанијата.
Покрај двата објекти, на продажба се и станови на улицата „Максим Горки“, како и деловниот простор „Пивница“. Според одлуката, претседателот на Управниот одбор е овластен да ги потпише купопродажните договори, а цената ќе биде утврдена од овластен проценител, по што процесот влегува во следна фаза.
Хотелот „Бристол“ е еден од најстарите зачувани хотелски објекти во Скопје, изграден во 1924 година и поврзан со развојот на градската урбана култура. Објектот со години не е во функција и ја дочека својата стогодишнина со затворени врати.
„Јадран“, познат и како Арапска куќа, е изграден меѓу 1936 и 1938 година во арапско-маварски стил и со децении претставува препознатлив белег на централното градско подрачје. Во дел од јавните евиденции се води како објект под заштита, со постапки за утврдување статус на културно наследство.
Продажбата на овие објекти повторно ја отвора дилемата за балансот меѓу комерцијалната вредност на недвижностите и зачувувањето на градската меморија.
Според претходни информации, „Македонијатурист“ планира и купување градежна парцела во Ново Лисиче во вредност од 17,7 милиони евра, што ја става продажбата на старите објекти во поширок деловен контекст.
