СДСМ преку соопштение упати остри обвинувања кон премиерот Христијан Мицкоски, тврдејќи дека ги доведува граѓаните во заблуда за европската иднина на Македонија.
Од опозициската партија наведуваат дека изјавите на претседателот на Европскиот совет, Антонио Кошта, како и извештајот на известувачот на Европскиот парламент, Томас Вајц, потврдуваат дека уставните измени остануваат клучен услов за отворање на пристапните преговори со Европската Унија.
„Мицкоски ги лаже граѓаните за европската иднина на Македонија, неговата Влада не испорачува никакви реформи“, се наведува во соопштението на СДСМ.
Од партијата тврдат дека нема дополнителни гаранции, нова преговарачка рамка или уставни измени со одложено дејство, оценувајќи дека претходните најави на премиерот биле, како што велат, „неосновани ветувања“.
СДСМ се повикува и на европратениците, кои според нивниот став, констатирале недостиг на напредок во клучни области како владеење на правото, судски реформи и борба против корупцијата.
Во реакцијата се споменуваат и обвинувања за „дезинформациски кампањи“, кои СДСМ ги поврзува со политичко влијание од надвор, вклучувајќи и наводи за поврзаност со политички структури во регионот.
„Вистината е на виделина. Со ова раководство нема европска иднина, туку изолација и стагнација“, наведуваат од опозицијата.
СДСМ повикува на итни реформи и распишување референдум на кој граѓаните би се изјасниле за европската интеграција на земјата.
„Реформи сега. Европа сега. Референдум веднаш“, порачуваат од партијата.
