Според прелиминарните резултати на Централната изборна комисија во Приштина, врз основа на обработени 97,76 проценти од гласачките места, Движењето Самоопределување е во водство на денешните вонредни парламентарни избори во Косово со освоени 43,03 проценти од гласовите, односно 294.251 глас.
На второто место се наоѓа Демократската партија на Косово со 21,15 проценти или 144.618 гласови, додека трета е Демократската лига на Косово со 17,68 проценти и 120.870 гласови.
Алијансата за иднината на Косово освои 7,22 проценти, односно 49.345 гласови.
Најсилната српска политичка партија во Косово, Српската листа, освои 5,89 проценти или 40.291 глас. Според податоците на ЦИК, таа забележала убедлива победа во сите средини каде што Србите се мнозинство.
Другата српска партија што учествуваше на изборите, „За слобода, правда и опстанок“, освои 0,73 проценти или 4.962 гласа. Според објавените податоци, дел од нејзините гласови дошле и од општини со доминантно албанско население.
Членот на претседателството на Српската листа, Игор Симиќ, изјави дека партијата ги освоила сите десет загарантирани мандати во српските средини, но обвини дека повторно ѝ бил одземен еден пратенички мандат во корист на друга листа.
Во прелиминарните резултати не се вклучени гласовите од условните избирачки места, гласачите со посебни потреби и гласањето од дијаспората.
Излезноста на изборите изнесуваше 36,88 проценти, што е за околу осум проценти помалку во споредба со изборите од декември 2025 година. Најголема излезност е регистрирана во општините со мнозинско српско население.
Собранието на Косово брои 120 пратенички места, од кои 10 се резервирани за српската заедница, 10 за останатите немнозински заедници, додека за преостанатите 100 места се натпреваруваат политичките партии од албанскиот блок.
