Соединетите Американски Држави експресно ги демантираа информациите објавени во дел од медиумите за наводен договор или привремен аранжман со Иран, оценувајќи ги како неточни и целосно измислени. Од Вашингтон нагласуваат дека нема никаква промена во нивната политика кон Техеран.
Портпарол на Советот за национална безбедност на Белата куќа категорично ги отфрли шпекулациите за тајни преговори кои би резултирале со договор.
„Овој извештај е неточен и погрешен. Секое тврдење за некаков договор, било привремен или конкретен, е целосна измислица“, се наведува во официјалната реакција.
Реакцијата следува по медиумски написи дека САД и Иран наводно биле блиску до договор за ограничување на иранската нуклеарна програма во замена за ублажување на санкциите.
Американската администрација повтори дека нејзината стратегија останува непроменета и дека приоритет е спречување на Иран да развие нуклеарно оружје, како и продолжување на санкциите поради активности што ја загрозуваат стабилноста на Блискиот Исток.
Според дипломатски извори, комуникациски канали преку посредници постојат, но во моментов нема основа за постигнување нов договор или значаен напредок во преговорите.
