Најмалку пет лица загинаа, а 23 се повредени во текот на ноќта во руски балистички ракетен напад врз Киев, соопшти градоначалникот на украинската престолнина, Виталиј Кличко.
Според градските власти, нападите предизвикале штети на повеќе од 12 локации низ Киев. Оштетени се станбени згради, медицинска установа и образовен објект, додека на неколку места избувнале пожари.
Пожарите зафатиле магацински објекти, а спасувачките и противпожарните екипи работат на расчистување на последиците и евакуација на загрозените жители.
Русија во последниот период ги интензивира балистичките напади врз украинската престолнина, додека Украина предупредува дека ограничените резерви на системите за противвоздушна одбрана ја отежнуваат заштитата од ваков вид ракети.
