Русија успешно ја тестираше својата крстосувачка ракета на нуклеарен погон која може да носи нуклеарна боева глава. За неа Москва тврди дека може да ги избегне сите одбранбени системи и дека наскоро ќе започне нејзино распоредување. Американците оваа ракета ја нарекуваат „летечки Чернобил“.
Рускиот генерал Валериј Герасимов, началник на Генералштабот на руските вооружени сили, му соопштил на Путин дека ракетата прелетала 14.000 километри и била во воздух околу 15 часа при тестирањето извршено на 21 октомври.
Русија тврди дека ракетата 9М730 „Буревестник“ – која НАТО ја означува како SSC-X-9 Skyfall – е „непобедлива“ за сегашните и идни противракетни системи, со речиси неограничен дострел и непредвидлива траекторија на лет.
„Тоа е единствено оружје што никој друг во светот го нема“, изјави Путин и додаде дека некои руски експерти во минатото му тврделе дека такво оружје веројатно никогаш нема да може да се изработи, но сега, како што нагласи, завршено е неговото „клучно тестирање“.
Генералот Герасимов изјави дека проектилот летал на нуклеарен погон и дека овој тест бил различен од претходните, затоа што ракетата прелетала толку голема далечина, иако нејзиниот дострел во суштина е неограничен. Тој нагласи дека оваа ракета може да избегне секаков противракетен систем.
МОЖЕБИ ЌЕ ВЕ ИНТЕРЕСИРА
