Регионалниот спортски самит „Скопје 2025“ денеска ја истакна улогата на спортот како клучен фактор за здраво, современо и просперитетно општество. Настанот, под покровителство на Министерството за спорт на Република Македонија, собра министри, спортски функционери и делегати од регионот.
„Овој самит не е само формален настан, туку платформа за заеднички визии, размена на искуства и градење нови партнерства. Преку регионална соработка и поддршка од институциите, спортот ќе биде двигател на здраво, современо и просперитетно општество“, истакна министерот за спорт Борко Ристовски во воведното обраќање.
Во рамки на самитот, вицепремиерот и министер за транспорт и врски Александар Николоски најави поголеми инвестиции во спортската инфраструктура низ целата држава, како и нови законски измени за финансиски олеснувања при инвестирање во спортот.
На панелот „Спонзорства во спортот: Како до профитабилни партнерства“, министерката за финансии Гордана Димитриеска-Кочоска повика компаниите да вложуваат во спортот, истакнувајќи дека инвестициите во училишниот спорт создаваат дисциплинирани и победнички ориентирани граѓани и потенцијални квалитетни работници за компаниите.
Присутните беа инспирирани и од мотивирачката приказна на фудбалската легенда Горан Пандев, кој ја потенцираше важноста на спортот.
Првиот панел „Како спортот ја обликува иднината на Балканот: Преку соработка до успех“ донесе дискусија меѓу министрите за спорт од Македонија, Србија и Црна Гора, кои се согласија дека регионалната соработка е клучна за развој на инфраструктурата, младите таленти и заедничката визија за иднината на Балканот.
Самитот продолжува со девет панели на теми од областа на спортот, со цел размена на искуства, поттик на регионална соработка и истакнување на улогата на спортот во современото општество.
