Речиси целата територија на Македонија се наоѓа во зона со висок ризик од пожари, според метеоролошкиот индекс за опасност од пожари, информира Центарот за управување со кризи.
Според податоците, најголем дел од земјата е означен со портокалова боја, што укажува на висок ризик од појава и брзо ширење на пожари на отворен простор и шумски пожари со висок интензитет. Исклучок се Шар Планина и подрачјата околу Охрид и Ресен, каде е регистриран среден ризик (жолта зона).
Од ЦУК апелираат граѓаните да бидат исклучително внимателни, особено при престој во природа, и да избегнуваат користење оган на отворено.
Надлежните предупредуваат дека во услови на суво време и високи температури, дури и мала невнимателност може да предизвика пожар со сериозни последици.
Доколку граѓаните забележат пожар, веднаш треба да пријават на единствениот број за итни случаи 112.
