Македонија убедливо ја прегази Словачка и обезбеди нов пласман на големо натпреварување, откако во реванш баражот во Скопје славеше со убедливи 38-23 пред преполната сала во СЦ „Борис Трајковски“. Избраниците на Кирил Лазаров одиграа доминантен натпревар од првата до последната минута и со вкупни 69-47 во двомечот ја елиминираа Словачка.
Со ова македонската ракометна репрезентација го продолжи континуитетот на настапи на големите натпреварувања, а победата од 15 гола разлика е најубедлив триумф во бараж натпреварите во историјата на националниот тим. Претходниот рекорд беше против Грција во 2014 година.
Македонија одлично го отвори натпреварот и уште на стартот покажа дека нема да дозволи никакво изненадување. Голманот Никола Томовски веднаш запиша две важни интервенции, а во нападот сигурни беа Лазаревски и Велковски за рано водство од 2-0.
Словаците тешко наоѓаа решение против цврстата македонска одбрана, а капитенот Филип Кузмановски со серија голови ја креваше атмосферата на трибините. По погодоците на Атанасијевиќ, Митев и Велковски, Македонија брзо стигна до убедливи 9-3, што го натера гостинскиот селектор да побара тајм-аут.
Но, ниту тоа не ја прекина македонската доминација. Нашите ракометари продолжија со одлична игра во двата правци, а разликата постојано растеше. Со головите на Кузмановски, Ристевски и Костески, Македонија поведе со 13-5 и практично уште тогаш го реши победникот.
До крајот на првото полувреме избраниците на Лазаров играа сигурно и дисциплинирано, а на пауза заминаа со убедливи 18-11. Кузмановски веќе имаше шест гола, Томовски шест одбрани, а публиката во „Борис Трајковски“ уживаше во одличната атмосфера и доминацијата на националниот тим.
Вториот дел Македонија го отвори уште помоќно. Со серија од шест гола за само неколку минути, нашите ракометари стигнаа до двоцифрена предност од 24-13. Погодуваа Кузмановски, Велковски, Лазаревски и Митев, додека Словаците делуваа целосно немоќно.
Иако гостите накратко успеаја да намалат на 24-16, Македонија веднаш возврати и повторно ја зголеми разликата. Одбраната функционираше беспрекорно, а во нападот шанса добија и резервистите кои исто така одлично ја искористија довербата.
Во финишот Македонија целосно ја разби Словачка и стигна до највисоки плус 15. Публиката со овации го поздрави секој потег на ракометарите, а победата беше заокружена со конечни 38-23.
Најефикасен во македонскиот состав беше капитенот Филип Кузмановски со 11 погодоци, додека Мартин Велковски имаше перфектен учинок со шест гола од шест обиди. Милан Лазаревски додаде пет погодоци, а Томовски повторно беше сигурен меѓу стативите.
