Цените на авионските билети во Европа би можеле да се зголемат за меѓу 10 и 20 проценти во текот на следната година, предупреди извршниот директор на „Рајанер“, Мајкл О’Лири.
„Очекувам цените на авионските билети во Европа да пораснат за 10, 15, па можеби дури и 20 отсто во текот на следните 12 месеци“, изјави О’Лири на прес-конференција во Брисел, пренесува „Ројтерс“.
Според него, главната причина за очекуваното поскапување е наглиот раст на цените на авионското гориво, предизвикан од конфликтот на Блискиот Исток. Тој посочи дека тоа дополнително ги намалува профитните маржи на авиокомпаниите кои претходно не ги заштитиле своите трошоци за гориво преку хеџинг-договори.
О’Лири нагласи дека „Рајанер“ и дел од другите европски авиопревозници имаат добро обезбедени позиции за 2026 година, но оцени дека повеќето компании имаат многу ограничена заштита за периодот по април 2027 година.
Тој објасни дека на почетокот на конфликтот, кон крајот на февруари, „Рајанер“ имал обезбедено 80 проценти од потребните количини гориво по цена од 67 долари за барел, со што бил покриен периодот до март 2027 година.
За следната година, пак, компанијата има обезбедено само 15 проценти од потребите за гориво по цена од 85 долари за барел, што, како што посочи О’Лири, сè уште е значително под актуелните пазарни цени.
На прес-конференцијата во Брисел, првиот човек на „Рајанер“ најави и дека компанијата ќе укине 20 авиолинии и повеќе од еден милион седишта од зимскиот распоред во Белгија. Причината, според него, е планираното зголемување на таксата за воздушен сообраќај во земјата, која од јануари ќе се зголеми од два на седум евра.
