Кошаркарските екипи на Работнички и Куманово продолжуваат со негативната серија на стартот од 2026 година. Куманово доживеа тесен пораз на гостувањето кај Феникс, во натпревар исполнет со неизвесност и чести промени во водството. Гостите имаа предност во самиот финиш, но во последните минути потфрлија, што домаќините го искористија и славеа со 86-84.
Работнички, пак, загуби од Тиквеш на гостувањето во Кавадарци со 85-74. Скопјани добро го започнаа натпреварот и одиграа солидна прва четвртина, но тоа беше сè што успеаја да покажат. Тиквеш постепено ја презеде иницијативата и на полувреме имаше убедлива предност од 47-32. Обидите на Работнички да се врати во игра во последната четвртина останаа без резултат, па кавадарчани стигнаа до својата шеста победа сезонава.
Актуелниот шампион МЗТ Скопје продолжи со сигурните настапи и го совлада тимот на Ангели со 95-74, без поголеми проблеми. Во последниот натпревар од денешното коло, Кожуф ја оправда фаворитската улога и победи над Гостивар со 73-57.
