Рускиот претседател Владимир Путин нареди тридневен прекин на нападите врз Киев, кој почнува на полноќ, во пресрет на посетата на американските претставници на украинската престолнина. Одлуката беше објавена откако специјалните пратеници на американскиот претседател Доналд Трамп, Стив Виткоф, и Џаред Кушнер пристигнаа во Москва и се сретнаа со Путин во Кремљ.
Портпаролот на Кремљ, Дмитриј Песков, нагласи дека прекинот се однесува само на Киев, а не и на останатиот дел од Украина, и дека е поврзан со претстојните разговори на американската делегација во украинската престолнина.
Украинскиот претседател Володимир Зеленски, пак, соопшти дека Киев е подготвен до понеделник да се воздржи од напади врз Москва и очекува Русија да го почитува договорениот прекин на нападите врз Киев.
Виткоф и Кушнер по разговорите во Москва треба да отпатуваат во Киев, каде Зеленски најави дека украинската страна е подготвена за „содржаен разговор“ за можностите за завршување на војната. Американскиот претседател Доналд Трамп претходно изјави дека неговите претставници носат предлог за ставање крај на конфликтот и оцени дека постои добра можност дипломатската мисија да даде резултат.
Посетата се одвива по нови руски напади врз Украина, при што, според Зеленски, биле погодени два аеродрома во близина на Киев, меѓу кои и меѓународниот аеродром Бориспил. Москва засега е повоздржана околу можниот исход од преговорите, а рускиот заменик-министер за надворешни работи Сергеј Рјабков порача дека при решавањето на конфликтот Вашингтон мора да ја земе предвид „реалноста на теренот“.
