Владата на Бугарија денеска падна, откако премиерот Росен Жељазков поднесе оставка под притисок на масовните протести и тешката буџетска ситуација. Оставката беше најавена непосредно пред гласањето за интерпелацијата поднесена од опозицијата, иако самиот Жељазков изјави дека очекувал иницијативата за недоверба да не помине.
Жељазков рече дека владата ја донела одлуката во согласност со „гласот на народот“ и протестите што со денови ги полнеа улиците на Софија и другите градови, каде десетици илјади граѓани бараа оставка и повисоки приходи, обвинувајќи ја власта за ароганција и отуѓеност.
По неговата изјава дека кабинетот колективно се повлекува, сепак беше спроведено гласањето за недоверба, во согласност со процедурите. За пад на владата гласаа 106 пратеници од ПП-ДБ, „Преродба“, „Величе“ и МЕЧ. Пратениците од ГЕРБ, БСП и „Има Таков Народ“ одлучија да не гласаат.
Оставката доаѓа во чувствителен момент, пред планираниот влез на Бугарија во еврозоната на 1 јануари. Дел од опозициските партии, како и претседателот Румен Радев, остро се противат на воведувањето на еврото и бараа распишување референдум, но иницијативата беше одбиена. Радев синоќа им се обрати на граѓаните, истакнувајќи дека незадоволството е „масовно и оправдано“, критикувајќи ја власта за обиди да го релативизира протестниот бран.
Неизвесно останува дали земјата ќе оди на нови предвремени избори или ќе се обиде да состави ново парламентарно мнозинство.
