Рударите во Мјанмар (поранешна Бурма) откриле редок и исклучително голем рубин, за кој се смета дека е втор по големина пронајден во земјата, која е дел од Југоисточна Азија и со години е погодена од конфликти.
Огромниот скапоцен камен бил ископан во близина на градот Могок во регионот Мандалај, познат како центар на профитабилната индустрија за скапоцени камења, која во последниот период била и сцена на жестоки борби во граѓанската војна. Информациите ги пренеле државните медиуми, повикувајќи се на АП.
Необработениот рубин тежи околу 11.000 карати, односно 2,2 килограми, и бил пронајден во средината на април, веднаш по традиционалните новогодишни празнувања. Иако е помал од рекордниот камен од 21.450 карати пронајден во 1996 година, новиот рубин се смета за повреден поради неговата боја и квалитет. Тој е опишан како виолетово-црвен камен со жолтеникави нијанси, со висока рефлективност и умерена транспарентност.
Се проценува дека дури 90 проценти од светското производство на рубини потекнува од Мјанмар, главно од регионите Могок и Монг Хсу. Скапоцените камења, без разлика дали се тргуваат легално или преку шверц, претставуваат значаен извор на приходи во земјата.
Организациите за човекови права, меѓу кои и британската истражувачка група „Глобал витнес“, повикуваат на бојкот на скапоцените камења од Мјанмар, бидејќи индустријата со децении е поврзана со финансирање на воените власти.
Иако формално е воспоставена цивилна влада, земјата и понатаму е под силно влијание на војската, а претседателот Мин Аунг Хлаинг, кој ја презеде власта по воениот удар во 2021 година, останува клучна фигура во политиката. Тој неодамна лично го разгледал пронајдениот рубин во главниот град Најпјито.
Рударството на скапоцени камења во Мјанмар е и извор на финансирање за различни вооружени етнички групи, што дополнително го одржува долготрајниот конфликт во земјата. Безбедносната состојба во рударските региони останува нестабилна, а контролата врз нив често се менува меѓу војската и бунтовничките групи.
