Со изведување на материјални докази од страна на Обвинителството, денеска во судницата во затворот „Идризово“ продолжува судскиот процес поврзан со пожарот во кочанската дискотека „Пулс“, во кој животот го загубија 63 лица, а над 200 беа повредени.
На претходното рочиште, Обвинителството презентираше обемна документација која се однесува на објектот, неговата сопственичка структура и правното и фактичкото движење на имотот, односно целокупната историја на објектот во кој функционирала дискотеката „Пулс“.
Во судницата беа изведени документи поврзани со урбанистичките планови, геодетски елаборати, барање за легализација од 2011 година за дел од објектот кој бил воден како бесправен, како и записници од извршени инспекциски надзори. Презентирани беа и договор за закуп, документи за легализација, како и записник за одземени предмети и документација пронајдена по пожарот.
Обвинителството презентираше и фотографии од внатрешноста на дискотеката по реновирањето, обезбедени од вештачење на мобилниот телефон на првообвинетиот Дејан Јованов, при што беше нагласено дека за тие материјали не постои официјална документација.
Дополнително, беа изнесени и документи поврзани со Општина Кочани, меѓу кои записници од вонредни надзори во кои се констатирани неправилности – објектот со одобрение за лесна индустрија со години бил користен како угостителски објект, односно дискотека, без одобрение за пренамена.
Исто така, беа презентирани и барања за неиздавање лиценца за работа од 2012 година, како и комуникација меѓу Општината и Министерството за економија во врска со статусот на објектот и неговата намена.
Одбраната реагираше дека дел од доказите се прибавени на незаконит начин и побара тие да не бидат прифатени, оспорувајќи ја нивната процесна валидност.
Обвинителството изведе и записник за одземени предмети по пожарот, меѓу кои лични документи, лаптопи, каса со пари, како и 140 билети за влез во дискотеката „Пулс“. Презентирани беа и договор за патролно обезбедување меѓу фирмата „Рубикон секјурити солушнс“ и „ММММ Кафе ДООЕЛ“, како и записници од инспекциски надзори за безбедност и здравје при работа.
Пожарот во дискотеката „Пулс“ во Кочани избувна на 16 март 2025 година за време на настап на групата ДНК и се смета за една од најтешките трагедии во поновата историја на државата. Судењето го води судијката Дијана Груевска-Илиевска, а обвинението го застапува тим од 15 јавни обвинители.
