На денешното рочиште во Основниот кривичен суд во Скопје на судењето против сопругот Зоран Јованов, таткото на Васил кој предизвика тешка сообраќајна несреќа во која загина Фросина Кулакова, сведочеше сопругата Ана и нагласи сопругот не му дозволувал на Васил да вози додека не го положи возачкиот испит.
Таа рече дека возилото „пежо 207“ е купено 2016 година, непосредно по нејзиното вработување на работно место што било пооддалечено и лошо поврзано со јавен превоз. Прашана дали Зоран некогаш го дал тоа возило на управување на Васил, Ана рече дека „апсолутно никогаш го нема дадено, ниту одобрено, и бил секогаш категорично против Васил да го употреби за каква било пригода“.
И другите сведоци на одбраната сведочеа дека Зоран како „принципиелен и чесен човек“ не му дозволувал на синот да вози пред да добие возачка дозвола и додека не заслужи.
Судењето продолжува на 28 април со испитување уште четири сведоци, а во мај, како што е најавено, ќе треба да биде сослушан и Васил Јованов.
Судењето против Зоран Јованов, татко на Васил, почна во јуни 2025 година и тој се товари за „загрозување на безбедноста на сообраќајот со опасно дејство или средства“ откако во јануари 2025 година, неговиот син, Васил Јованов (осуден на 13 години затвор), управувајќи автомобил без возачка дозвола и под дејство на алкохол, удри во пешакот Фросина Кулакова на булеварот Партизански одреди, која почина на самото место.
