Шест патнички возила и стан му се привремено одземени на Александар Лазаров од Кочани, поради сомнение дека имотот е стекнат со криминална активност, соопшти Министерството за внатрешни работи.
Од МВР информираат дека Одделението за внатрешни работи Кочани, во координација со Основното јавно обвинителство Кочани, обезбедило докази кои упатуваат на основано сомнение дека осомничениот располага со значителен движен и недвижен имот што не кореспондира со неговите законски приходи.
По налог на Основниот суд Кочани, донесени се привремени мерки за обезбедување на имотот, при што се одземени шест автомобили – „џип“, „порше“, „фолксваген“, „ауди“, „бмв“ и „пасат“, како и еден стан.
Од МВР додаваат дека истрагата продолжува со цел да се утврди законитоста на стекнатиот имот.
Претходно, Основното јавно обвинителство Кочани соопшти дека против Лазаров, кој неодамна беше приведен откако избега од Полициската станица во Кочани, се води истрага за кривичното дело неовластено производство и пуштање во промет наркотични дроги, психотропни супстанции и прекурсори. Истрагата опфаќа уште едно лице, а двајцата се осомничени како соизвршители.
Според Обвинителството, истрагата е поведена откако при претрес на автомобил биле пронајдени осум грама кокаин.
Обвинителството наведува дека постои сомнение оти станот и шесте автомобили, иако дел од нив биле регистрирани на други лица, фактички биле во владение и користење на осомничениот, а нивната вредност не одговара на неговите законски приходи, што упатува на сомнение дека се стекнати со криминална активност или служеле за прикривање незаконски стекната имотна корист.
Лазаров вчера беше приведен од полициски службеници од СВР Скопје – Одделение за потраги, по што по предлог на јавен обвинител му беше определена мерка притвор и веднаш беше спроведен на нејзино издржување.
