Во ЈП „Национални шуми“ продолжуваат акциите за откривање и санкционирање на злоупотреби, откако во изминатите денови беа приведени директорот на подружницата „Бор“ во Прилеп и вработена во подружницата „Бабуна“ во Велес.
Информацијата ја соопшти заменик-директорот на претпријатието, Кире Михаилов, кој посочи дека, според податоците од Министерството за внатрешни работи, постојат сериозни сомнежи и докази дека двајцата се огрешиле пред законот.
Михаилов откри дека неодамна е поднесена и кривична пријава против вработен во подружницата во Свети Николе, кој претходно ја извршувал функцијата директор, како и против правно лице од Бузалково. Според него, со случајот е предизвикана штета проценета на повеќе од 50.000 евра.
Тој информираше дека во текот на изминатата седмица биле одземени и неколку камиони поврзани со лица осомничени за незаконски активности, а од правно лице во Скопје биле конфискувани околу 400 кубни метри огревно дрво, чија вредност се проценува на околу 30.000 евра.
„Правдата важи за сите. Нема големи и мали, ниту наши и ваши. Секој што се огрешил пред законот ќе одговара“, порача Михаилов, додавајќи дека, според него, завршило времето на неказнивост.
