Приведен сопственикот на „Компанија Марковски“ во Битола, се огласи и АД ЕСМ

Апсење од Финансиската полиција во Битола. Како што дознава Прва Скопска ТВ инспекторите го привеле сопственикот на „Компанија Макрковски“ – Борче Марковски. Неофицијално се дознава дека полицијата проверува и приведува и други инволвирани лица во незаконско работење на оваа компанија со РЕК Битола. Тие се осомничени за наместен тендер во износ од околу 100.000.000 денари, кои се испумпани од државниот буџет. Инаку, низ медиумите порано компанијата Марковски беше посочувана за една од најблиските на минатата влада. Тогаш беше споменувано дека таа фирма заработува по над 60 илјади евра на ден за ангажирани само 10 булдожери во РЕК Битола, затоа што најголемиот производител на струја во Македонија плаќал по 16.000 денари за час работа или за еден ден десетте булдожери ја чинеле државната компанија над 60.000 евра. Според информациите, Компанијата Марковски од разни договори со РЕК Битола за две години заработила 200 милиони евра од државата. Во меѓувреме се огласија од АД ЕСМ објаснувајќи дека ниту еден член од тековното раководство на РЕК Битола не е приведен, ниту инволвиран во тековната постапка. Од акционерското друштво ги охрабруваат институциите целосно да го расветлат случајот, со цел да се утврди фактичката состојба.