Претседателот на СДСМ Венко Филипче преку објава на социјалната мрежа Икс оцени дека претседателката Гордана Сиљановска-Давкова за првпат јавно изнела ставови кои според него СДСМ и граѓанскиот Фронт за вистина и правда ги застапуваат подолг период.
Филипче се осврна на изјавата на Сиљановска-Давкова дека Македонија треба да се европеизира преку реформи и владеење на правото, а не преку историски и идентитетски дебати, нагласувајќи дека историските спорови со Бугарија не се дел од европските услови за продолжување на преговорите со Европската Унија.
Тој истакна дека по првпат некој од ВМРО-ДПМНЕ јавно го кажува она што СДСМ, а сега и поширокиот граѓански фронт, го повторува подолго време. Според него, историските спорови со Бугарија и работата на Историската комисија се билатерално прашање, а не европски услов.
Филипче посочи дека реформите и исполнувањето на Копенхашките критериуми се клучни за напредокот на државата кон Европската Унија и дека тие не претставуваат закана за македонскиот јазик, култура и национален идентитет.
Во објавата тој упати критики и кон премиерот Христијан Мицкоски, обвинувајќи го дека преку лаги и пропаганда го дели народот и ја изолира државата, како што наведе, поради сопствените криминали и корупција.
На крајот од објавата Филипче директно ѝ се обрати на претседателката, заблагодарувајќи ѝ се за вистината и изразувајќи надеж дека како професорка по право ќе биде на страната на правдата, со порака „реформи сега, Европа сега“.
