Претседателот на Европскиот совет Антонио Кошта денеска попладне ќе престојува во посета на земјава, каде што ќе се сретне со премиерот Христијан Мицкоски.
Одговарајќи на новинарски прашања за очекувањата од претстојната средба со високиот европски претставник и за можноста за поместување на ставовите на Владата во однос на уставните измени, кои се услов за продолжување на преговорите со Европската Унија, Мицкоски истакна дека нема да поддржи, како што рече, „авантура без извесен крај“, доколку не добие гаранции дека во иднина нема да има нови условувања од бугарска страна.
„Многу пати сме дале став по тоа прашање и нашиот став е непроменлив. Немам намера како претседател на Владата да поддржам авантура без извесен крај. Сакаме да го изодиме процесот брзо, но не со неизвесен исход. Три и пол децении сме сведоци на политички авантури и стоиме во исто место“, изјави Мицкоски.
Тој додаде дека процесот мора да биде двонасочен и дека е потребно градење меѓусебна доверба меѓу страните. Според него, доколку постои европски консензус дека нема да има дополнителни условувања, тоа треба да биде формализирано во заклучоци и да се продолжи со разговори во нова фаза.
Мицкоски нагласи и дека Владата останува посветена на реформската агенда и на дијалогот со Европската Унија, но инсистира на испорака и од другата страна во процесот.
Во однос на можноста за трилатерална средба, премиерот истакна дека Владата е подготвена за разговори, но дека е потребна јасна координација за форматот и учесниците.
„Подготвени сме да разговараме, но треба однапред да се знае каде и со кого“, изјави тој.
По средбата со Кошта, премиерот ќе одржи тет-а-тет разговор, по што ќе следи состанок на двете делегации и заедничка прес-конференција во Владата.
Посетата на Кошта е дел од неговата турнеја низ Западен Балкан, во рамки на која ќе учествува и на самитот ЕУ–Западен Балкан во Тиват, Црна Гора. Тој ќе разговара за проширувањето, регионалната соработка и безбедносните предизвици во регионот.
