Апелациониот суд Скопје донесе правосилна пресуда со која делумно ја уважи жалбата на Зијадин Села и го зголеми надоместот што Република Македонија треба да му го исплати за нематеријалната штета што ја претрпе во нападот во Собранието на 27 април 2017 година.
Со одлуката, државата е задолжена да му исплати на Села вкупно 7,8 милиони денари, наместо претходно досудените 5,5 милиони денари од Основниот граѓански суд Скопје.
Во образложението, Апелациониот суд наведува дека првостепениот суд не ја оценил во целост тежината на повредите и последиците што ги претрпел Села, поради што претходниот износ не претставувал правично обештетување.
Судот при определувањето на висината на надоместот ги зел предвид интензитетот и времетраењето на физичките и психичките страдања, намалената животна активност, влијанието врз секојдневното функционирање, како и јавниот карактер на настанот.
Според пресудата, на Села му се доделуваат:
1,5 милиони денари за претрпени физички болки;
900.000 денари за претрпен страв;
3 милиони денари за душевни болки поради намалена општа животна активност;
600.000 денари за душевни болки поради нагрденост;
600.000 денари за повреда на личното достоинство;
600.000 денари за повреда на честа;
600.000 денари за повреда на угледот.
На вкупниот износ ќе се пресметува и законска казнена камата од 1 јуни 2023 година до конечната исплата.
Апелациониот суд ја одбил жалбата на Државното правобранителство, кое барало укинување на пресудата и повторување на постапката. Истовремено, делумно ја прифатил жалбата на Села, но го одбил неговото барање за исплата на дополнителен надомест над 7,8 милиони денари. Во тужбата тој побарувал вкупно 61 милион денари.
Во пресудата се наведува дека Села на 27 април 2017 година бил нападнат од повеќе лица во Собранието, при што се здобил со тешки телесни повреди опасни по живот. Судот се повикал на правосилните кривични пресуди за нападот и на медицинските вештачења, според кои кај Села останале трајни физички и психички последици, вклучително и посттрауматски симптоми и намалена животна активност.
Со истата одлука, Република Македонија е задолжена да му ги надомести и трошоците за судската постапка во износ од 210.715 денари.
