Иселувањето, особено на младите таленти е голем проблем за македонската економија. Ова го констатираа и големите компании и нивните раководни кадри на самитот „Македонија 2025″. Секако, се очекува соодветна реакција околу овој голем проблем и од државните институции. Но, прават ли доволно самите компаниите и нивните газди за младите таленти да не ја напуштаат Македонија?
Младите таленти најчесто заминуваат затоа што бараат подобри услови – повисоки плати, сигурност и јасна перспектива. А тоа не се решава само со напишани стратегии, туку со конкретни понуди на пазарот на труд.
Дали компаниите навистина ги препознаваат талентите? Им нудат ли успешните фирми кариерен развој и дали се подготвени да ги платат колку што вредат? Или пак очекуваат врвен кадар, ама за просечна плата?
Без промена во односот кон работниците, тешко дека ќе се запре иселувањето на младите, а талентите ќе ни заминуваат во странство за да работаат во тамошни компании, кои знаат да ја препознаат нивната способност и знаат дека тоа треба да се плати.
Затоа, покрај државните политики, одговорноста околу задржување на младите талентирани кадри е и кај бизнис секторот.
