Репрезентациите на Франција и САД ќе играат во финалето на Светското првенство во кошарка за жени, откако успешно ги поминаа полуфиналните пресметки во Берлин.
Француските кошаркарки испишаа историја, откако во полуфиналето убедливо ја совладаа Германија со 86-64 и за првпат во својата историја обезбедија пласман во финалето на еден светски шампионат.
Франција уште од почетокот на натпреварот ја презеде контролата и не ѝ дозволи на домашната селекција да се врати во игра, со што стигна до најголемиот успех во историјата на женската кошаркарска репрезентација.
Во второто полуфинале, САД мораа добро да се намачат против Шпанија. Американките дури во последната четвртина успеаја да го скршат отпорот на противничките и со победа од 76-66 обезбедија место во финалето.
За селекцијата на САД ова ќе биде петто последователно финале на светските првенства, а Американките ќе имаат можност повторно да ја потврдат доминацијата во женската кошарка.
Финалниот дуел меѓу Франција и САД ќе се одигра вечерва со почеток во 20 часот, а ќе биде реприза на олимпиското финале од Париз 2024 година, кога Американките славеа минимална победа со 67-66.
