Во Македонија остануваат активни четири пожари, иако во текот на ноќта се изгаснати дури 21 од вкупно 25 пожари регистрирани вчера. Директорот на Дирекцијата за заштита и спасување, Стојанче Ангелов, информира дека пожарната состојба и понатаму е сериозна, но на дел од жариштата има значително подобрување.
Пожарот кај селото Драгов Дол во Општина Македонски Брод е значително намален и се очекува наскоро целосно да биде локализиран. Вчера во неговото гаснење учествуваа полициски хеликоптер и три противпожарни летала, со чија помош беа изгаснати повеќе краци од огнот. Активен останува само еден дел на карпест и тешко пристапен терен, но според надлежните, ниту едно населено место не е загрозено.
Посериозна е состојбата во Велешко, каде пожарот што започна кај селото С’лп се прошири кон атарите на Добриново и Тисовица во Општина Зелениково. Велешките пожарникари се концентрирани на заштита на селата, а утрово работеле на создавање одбранбена линија низ густите грмушки за да го запрат ширењето на огнот. Во овој предел главно гори нискоквалитетна шума, грмушки и трње.
Активен останува и пожарот кај Рамни Габер во Општина Студеничани, каде огнот зафати ниска шума, грмушки и сува вегетација. Дополнителен проблем претставува исклучително непристапниот терен, поради што интервенцијата е значително отежната. На терен се ангажирани екипи од скопската противпожарна бригада.
Пожарот над селото Копанце во Општина Јегуновце сè уште е активен, а еден негов крак се движи кон селото Бојане во Општина Сарај. Според надлежните, засега нема непосредна опасност за населените места.
Активен е и пожарот на депонијата во Кратово, каде се очекува затрупување на депонијата за да се намали чадот и ширењето на непријатната миризба.
Центарот за управување со кризи информира и за пожар во населбата Балканска во Штип, каде гори ниска вегетација, додека под контрола се пожарите кај селото Железница во Општина Кратово и на депонијата во Делчево.
Директорот на ДЗС, Стојанче Ангелов, повторно апелираше граѓаните да не палат оган на отворено. Тој објави фотографија од огниште покрај реката Треска, опкружено со сува трева, грмушки и борова шума, предупредувајќи дека и најмала искра може да предизвика нов голем пожар.
