Проектот за изградба на автопатската делница Кичево – Букојчани влегува во фаза на конкретна реализација, откако Јавното претпријатие за државни патишта склучи договор за надзор над градежните работи.
Договорот е потпишан со конзорциум предводен од „Градежен институт Македонија“ АД Скопје, во кој учествуваат и „ДИВИ Македонија“ ДОО Скопје и ГЕИНГ ДОО Скопје. Надзорниот орган ќе има задача да обезбеди квалитетно, безбедно и навремено спроведување на градежните активности.
Изборот на компаниите следува по спроведена двофазна тендерска постапка со претквалификација преку меѓународен отворен тендер, реализиран според правилата на Европската банка за обнова и развој (ЕБОР), со нејзино одобрување.
Новата автопатска делница е долга 11,5 километри и претставува дел од Коридорот 8. Изградбата ќе се реализира во две фази – првата ќе ја опфати трасата од селото Црвевци до Кичево, додека втората ќе го поврзе Долно Строгомиште со Црвевци.
Од ЈП за државни патишта посочуваат дека проектот има особено значење поради сложениот ридско-планински терен и потребата од побезбедна и посовремена патна врска, која ќе претставува алтернатива на постојното патување преку Стража.
Надзорниот тим ќе ја контролира реализацијата на работите согласно проектната документација, како и пропишаните стандарди за квалитет и безбедност при изградбата.
