Полицијата започна со контролите според новите правила за користење електрични тротинети, а во првите денови од примената на изменетите прописи веќе се изречени 12 парични казни за различни сообраќајни прекршоци.
Новите одредби од Законот за безбедност на сообраќајот на патиштата стапија во сила на 14 јули, со што се воведоа построги правила за управувањето со електрични тротинети, со цел зголемување на безбедноста на сите учесници во сообраќајот.
Највисоката казна досега изнесува 100 евра, а му е изречена на возач кој користел мобилен телефон додека управувал со електричен тротинет.
Полицијата санкционирала и три лица кои управувале со тротинет без заштитен шлем, за што казната изнесува 50 евра. Најголем број прекршоци, девет вкупно, се однесуваат на движење со електрични тротинети по површини каде што тоа не е дозволено, а за овој прекршок е предвидена глоба од 80 евра.
Од Министерството за внатрешни работи информираат дека во досегашните контроли не е одземен ниту еден електричен тротинет. Сите санкционирани лица биле полнолетни.
Надлежните најавуваат дека контролите ќе продолжат и во наредниот период, со цел почитување на новите правила и намалување на ризиците за учесниците во сообраќајот.
