Денеска официјално ќе биде означен почетокот на изградбата на автопатот Букојчани – Кичево, една од клучните делници на Коридорот 8, која треба да обезбеди современа патна врска меѓу превојот Стража и Кичево.
Проектот ќе се реализира во две фази. Во првата ќе се гради делницата од селото Црвевци до Кичево, додека втората фаза ќе ја опфати трасата од Долно Строгомиште до Црвевци.
Средствата за реализација на проектот се обезбедени преку заем од Европската банка за обнова и развој (ЕБОР), како и преку грантови од Инвестициската рамка за Западен Балкан.
Надзорот над изградбата ќе го врши конзорциум предводен од Градежниот институт Македонија. Договорот за надзор беше потпишан на 30 септември со Јавното претпријатие за државни патишта.
Со реализацијата на оваа делница се очекува значително подобрување на патната инфраструктура во западниот дел од државата и побрзо поврзување по должината на Коридорот 8.
