Августовската испитна сесија за екстерните испити од државната матура започнува денеска, а полагањето ќе продолжи и во петок (14 август), со почеток во 9 часот.
Според податоците на Државниот испитен центар (ДИЦ), во августовскиот рок се пријавени 1.328 ученици за државна матура, 126 за стручна матура и шест кандидати за уметничка матура.
Денеска кандидатите ќе го полагаат изборниот екстерен предмет – математика или англиски јазик. За германски, француски, италијански и руски јазик, како и за предметот историја, нема пријавени кандидати во оваа испитна сесија. Во петок ќе се полага задолжителниот екстерен испит по мајчин јазик и литература.
Поради значително помалиот број пријавени во однос на јунската сесија, полагањето ќе се организира во четири градови на осум локации. Испитите ќе се одржат на Економскиот, Градежниот и Педагошкиот факултет во Скопје, како и на факултети во Тетово, Прилеп и Штип. Од средните училишта, единствена локација ќе биде спортската сала на АСУЦ „Боро Петрушевски“ во Скопје, каде ќе полагаат ученици од повеќе училишта. ДИЦ веќе објави список со распоредот на кандидатите по локации.
Меѓу пријавените има и 226 матуранти на кои им беше поништен испитот во јунската сесија. Дел од нив беа фатени како препишуваат за време на полагањето, додека кај други неправилностите биле утврдени при проверката на тестовите.
Просечната оценка од јунската испитна сесија изнесува 3,66. Просекот за државната матура е 3,62, за стручната 3,91, а за уметничката 3,59.
Министерката за образование и наука Весна Јаневска и директорката на ДИЦ, Даниела Јовчевска-Михајловска, оценија дека резултатите покажуваат стабилен квалитет, бидејќи просекот е речиси идентичен со минатогодишниот, кога изнесуваше 3,69, за разлика од 2024 година, кога беше 3,26.
Јаневска истакна дека годинава за првпат целосно се применува новата Концепција за матура, која предвидува три вида завршни испити, овозможувајќи учениците да бидат оценувани според програмите што реално ги изучувале во текот на средното образование.
Во јунската сесија беа пријавени 14.587 ученици, од кои 12.184 за државна матура, 2.276 за државна стручна матура и 127 за државна уметничка матура. На испитите не се појавиле 348 кандидати, што претставува 2,39 проценти од пријавените.
По објавувањето на резултатите биле поднесени 805 приговори, односно 2,86 проценти од вкупниот број матуранти. Дел од нив биле прифатени, а увид во тестовите побарале 133 ученици.
