Новата учебна година денеска започна за околу 238.000 ученици во основните и средните училишта низ Македонија. Од нив, 174.000 се основци, 64.000 средношколци, а за првпат во училишните клупи седнаа 14.952 првачиња. Наставата за сите ученици ќе трае до 10 јуни, додека матурантите ќе ја завршат учебната година на 17 мај.
Според Министерството за образование и наука, обезбедени се учебници за сите ученици, а годинава се набавени 622.000 примероци. Целосно нови учебници се обезбедени за прво, второ и трето одделение, како и за осмо одделение и втор клас во гимназиското образование, каде што ќе се учи според нови наставни програми.
Во 620 од вкупно 1.023 училишни објекти во основното и средното образование наставата ќе се одвива во една смена. За учениците со посебни образовни потреби се ангажирани 1.358 образовни асистенти во основните и 166 во средните училишта. Во тек е проширување на капацитетите на 14 училишта, а во следните месеци е најавен почеток на уште 15 вакви проекти. Завршени се реконструкции во дваесетина училишни објекти и спортски сали, се градат четири нови сали, а во тек се и околу 50 капитални инвестиции во образовната инфраструктура.
Новата учебна година, сепак, почнува со продолжување на негативниот демографски тренд, поради што 26 подрачни училишта без запишани ученици времено се затвораат, а вкупно 148 училишни објекти во земјава се празни. Поради оптимизацијата на училишната мрежа, годинава ќе има 433 паралелки помалку – 222 во основното и 211 во средното образование.
