Сара Бекстром, припадничка на Националната гарда на Западна Вирџинија, која беше тешко ранета во вооружен напад во близина на Белата куќа, почина од здобиените повреди. Веста ја соопшти претседателот на САД, Доналд Трамп. Вториот гардист повреден во истиот инцидент и понатаму се наоѓа во критична состојба.
Според NBC News, Бекстром имала само 20 години и служела од јуни 2023 година како дел од 863. чета на воена полиција. Трамп ја опиша како „многу почитувана, млада и прекрасна личност“.
Критично повреден е и 24-годишниот Ендру Волф, наредник на Американското воздухопловство од Мартинсберг. Двајцата биле дел од мисијата „Безбедно и убаво“ во Вашингтон кога во средата, околу 14:15 часот, биле застрелани – помалку од еден ден по добиеното одобрение за патролирање низ градот.
Таткото на Бекстром на Фејсбук ја потврди смртта на својата ќерка, нарекувајќи ја „страшна трагедија“. Таткото на Волф, пак, апелираше: „Молете се за мојот син“.
Осомничениот за нападот е Рахманулах Лаканвал, државјанин на Авганистан за кој, според ЦИА, постојат податоци дека соработувал со американските сили во Авганистан. Тој бил ранет при приведувањето и се наоѓа во болница. Против него се поднесени обвиненија за обид за убиство и незаконско поседување оружје за време на насилен инцидент.
