Двегодишното дете кое беше тешко повредено од метален предмет во пределот на главата за време на новогодишната ноќ, за жал, ја загуби битката за живот. Детето почина на Клиника за детска хирургија во Скопје, и покрај напорите на лекарите да го спасат.
Телото е предадено на обдукција, по што патолозите треба да утврдат од каков вид метален предмет станува збор и како тој завршил во главата на детето. Според досегашните сознанија, повредата настанала за време на новогодишниот огномет, а неофицијално се споменува дека инцидентот се случил на подрачјето на Шуто Оризари.
Од претходно направените медицински испитувања и скен не можело со сигурност да се утврди дали металното парче потекнува од испукан куршум или од друг извор.
Според изјавата на мајката, таа и детето заедно присуствувале на новогодишниот дочек со огномет, кога дошло до трагичниот настан. Истрагата продолжува, а надлежните институции најавуваат дека јавноста ќе биде дополнително информирана по завршување на обдукцијата и анализите.
