По повеќечасовна непрекината интервенција, пожарот кај селото Лознани, на границата меѓу општините Могила и Прилеп, повеќе не претставува директна опасност за куќите, информираа директорот на Дирекцијата за заштита и спасување (ДЗС), Стојанче Ангелов, и командирот на Територијалната противпожарна единица од Битола, Христијан Тодоровски.
Тодоровски посочи дека пожарникарите во текот на денот се соочиле со исклучително тешки услови, откако огнената стихија се ширела на повеќе локации.
„Најпрвин имавме дојава за пожар кај прилепското село Маково. Почнавме таму да интервенираме, потоа се појави пожар во месноста Ергела кон селото Гнеотино, а во вечерните часови се разгори пожарот кај Лознани. Цел ден работевме на негово локализирање и успеавме да го ставиме под контрола“, изјави Тодоровски.
Тој нагласи дека најголема опасност постоела за селата Лознани и Новоселани, каде што огнот се приближил до куќите, но благодарение на напорите на пожарникарите и жителите, домовите биле спасени.
„Имавме премногу тешка борба. Беа загрозени куќи, но успеавме да ги спасиме. Во моментов активен е пожарот кон селата Лопатица, Мусинци, Кутуруз и Црничани“, додаде командирот на битолските пожарникари.
И директорот на ДЗС, Стојанче Ангелов, оцени дека била спречена голема катастрофа.
„Во голема опасност беше селото Лознани, но благодарение на пожарникарите од Битола и локалните жители спречена е голема катастрофа. Постои опасност огнот од задната страна да загрози друго село“, изјави Ангелов.
Двајцата надлежни изразија сомнеж дека дел од пожарите се намерно предизвикани.
„Се сомневаме дека пожарите биле подметнати бидејќи се движеа од различни страни, како намерно за да не може службите навреме да стигнат“, рече Тодоровски.
Покрај пожарот кај Лознани, во текот на вчерашниот ден во земјава биле активни уште десет пожари на отворен простор.
