Пратеничката на СДСМ, Славјанка Петровска, порача дека нејзиното учество во „Разговорите за Македонија“ не е насочено против партијата, туку, како што вели, е во интерес на СДСМ.
Нејзината реакција следува откако лидерот на СДСМ, Венко Филипче, најави дека партиските органи во текот на неделата ќе расправаат за нејзиното учество на настан модериран од Игор Ивановски.
Петровска потсети дека во 2024 година се кандидирала за претседател на СДСМ со програмата „Манифест за социјалдемократијата“, но се повлекла поради, како што наведува, кршење на принципите и правилата.
„Во моите настапи секогаш ги бранев ставовите на раководството, за да не се толкува дека опструирам. Соработував и помагав за доброто на СДСМ. Но, работите не се менуваа на подобро. На Конгрес јасно и гласно пратив порака дека мора да се менуваме, инаку ќе исчезнеме“, напиша Петровска.
Таа додава дека предложила ветинг на пратениците и партиското раководство, како и измени на Статутот со цел поголема моќ на одлучување да има членството, но, како што тврди, не добила одговор.
„Останав СДСМ. Моето учество во „Разговорите за Македонија“ не е против СДСМ, туку за СДСМ. Затоа што јас сум социјалдемократ и по убедување и по дејствување“, порача Петровска во објава на социјалните мрежи.
