Министерството за внатрешни работи соопшти дека во координирана акција спроведена на 28 септември е разбиена организирана криминална група од Скопје, осомничена за кривични дела од областа на тероризмот и недозволената трговија со оружје.
Акцијата ја реализирале Одделот за сузбивање на организиран и сериозен криминал, Агенцијата за национална безбедност, Одделот за специјални полициски операции и СВР Скопје, под раководство на јавен обвинител од Основното јавно обвинителство за гонење на организиран криминал и корупција.
Врз основа на судски наредби биле извршени претреси кај шест лица на вкупно 12 локации во Скопје, при што биле приведени пет лица.
При претресите биле пронајдени и одземени автоматски и снајперска пушка, пиштоли, рамки за оружје, муниција од различен калибар, тактички елек, радио-врски, официјално знаме на терористичката организација ИСИС, поголем број електронски уреди и мобилни телефони, како и поголема сума денарски и девизни парични средства.
Полицијата соопшти дека при акцијата било констатирано и неовластено користење електрична енергија, за што се преземаат дополнителни законски мерки.
Според истрагата, К.И. (34) од 2023 година дејствувал како припадник на огранок со идеолошка поврзаност со терористичката организација ИСИС, при што, според сомневањата, вршел радикализација на млади лица, ширел екстремистичка пропаганда и набавувал и ракувал со огнено оружје.
МВР наведува дека Б.А. (24) и Е.С. (30), заедно со К.И., формирале група која неовластено поседувала и тргувала со огнено оружје и муниција.
До Основното јавно обвинителство за гонење на организиран криминал и корупција е поднесена кривична пријава против К.И. за кривичните дела „тероризам“ и „неовластено изработување, држење, посредување и тргување со оружје или експлозивни материи“, додека против Б.А. и Е.С. е поднесена пријава за нелегална трговија со оружје.
