Портпаролот на Кремљ Дмитриј Песков изјави дека руската нафта во моментот е неопходна за глобалниот пазар поради нестабилноста предизвикана од војната на Блискиот Исток. Според него, конфликтот во регионот создава сериозни нарушувања во снабдувањето со енергенси и ја зголемува важноста на алтернативните извори на нафта.
Песков нагласи дека во услови на зголемени тензии и ризици за транспортот на нафта од земјите на Блискиот Исток, руските енергетски ресурси имаат значајна улога во одржувањето на стабилноста на светскиот енергетски пазар.
Ескалацијата на конфликтот во регионот веќе предизвика значителни турбуленции на енергетските пазари. Цените на нафтата растат, а експертите предупредуваат дека затворањето или ограничувањето на транспортот низ Ормутскиот теснец може дополнително да го наруши снабдувањето со енергенси на глобално ниво.
Поради овие ризици, некои земји се принудени да бараат алтернативни извори на нафта, а Русија, како еден од најголемите светски извозници, се обидува да ја искористи ситуацијата за да го зголеми своето присуство на меѓународните енергетски пазари.
