Предложените измени на правилата за боледување не го ограничуваат правото на боледување, туку предвидуваат медицинските критериуми за негово продолжување да почнат да се применуваат од петтиот, наместо од седмиот ден, изјави директорот на Фондот за здравствено осигурување, Златко Перински.
Во интервју за „Република“, Перински нагласи дека граѓаните нема да изгубат ниту еден ден од правото на боледување.
„Прво, не кратиме ниту еден ден боледување. Тоа е најважното нешто што граѓаните треба да го знаат“, изјави Перински.
Тој појасни дека петтиот ден не претставува максимално времетраење на боледувањето, туку момент од кој, доколку е потребно негово продолжување, ќе се применуваат дополнителни медицински критериуми.
Според него, пациентите и понатаму ќе можат да користат боледување 10, 20, 30 дена или подолго, доколку тоа го налага нивната здравствена состојба.
Перински потсети дека матичните лекари остануваат надлежни да утврдуваат привремена спреченост за работа до 15 дена, додека за подолг период, како и досега, ќе одлучува лекарската комисија на Фондот.
Тој додаде дека дополнителната дијагностика нема да биде задолжителна за сите пациенти и сите дијагнози. Предложените измени, според него, предвидуваат и олеснувања, меѓу кои дигитализација на постапката по 15-тиот ден од боледувањето и можност тешко болните лица да го остварат правото без физичко присуство.
Во однос на најавените контроли, Перински демантираше дека пациентите ќе мора постојано да бидат во своите домови, додавајќи дека Управниот одбор на Фондот повторно ќе ги разгледа предложените измени во вторник.
