Да се биде прв човек на градот претставува чест, но и голема одговорност кон граѓаните кои ја дале својата доверба со очекување за ред, работа и конкретни резултати, порача градоначалникот Орце Ѓорѓиевски во своето обраќање.
Тој истакна дека целта на актуелната градска власт не е привилегиран живот на товар на граѓаните, туку враќање на средствата назад кај народот преку реални проекти и подобри услови за живот.
„Секој денар од буџетот мора да се врати кај граѓаните – во нови улици, булевари, мостови, почист град и поквалитетни услуги“, порача тој.
Во обраќањето нагласи дека работи со личен пример, посочувајќи дека користи сопствено возило, сам ги покрива трошоците за гориво и службени патувања, додека средствата за репрезентација биле пренаменети за капитални проекти.
Според него, градот бил затекнат во сериозна криза, но за шест месеци биле вратени редот, функционалноста и надежта кај граѓаните.
Тој најави продолжување на реализацијата на капитални проекти кои, како што рече, ќе значат вистинска преродба на Скопје, со уште посилно темпо и поголема одговорност во иднина.
Воедно порача дека чесноста, транспарентноста и домаќинското работење се главните разлики меѓу актуелната и претходната власт, додавајќи дека Скопје заслужува администрација која работи исклучиво во интерес на граѓаните.
