Почнува пријавувањето преку системот „Мој термин“ за бесплатна вакцинација против сезонски грип, а здравствените власти очекуваат имунизацијата да започне веќе од следната недела. Прв приоритет ќе имаат граѓаните кои припаѓаат на ризичните категории, додека паралелно продолжуваат активностите за обезбедување дополнителни количини вакцини.
Во земјава веќе пристигнаа првите 30.000 дози од вакцината против сезонски грип, а според најавите, до 15 ноември ќе пристигнат уште 26.000. Со тоа вкупната количина ќе достигне 56.000 вакцини, додека Министерството за здравство работи да обезбеди вкупно 80.000 дози за претстојната сезона.
Пријавувањето на граѓаните ќе се одвива преку системот „Мој термин“, по што ќе следи повикување за вакцинација според утврдените приоритети. Најнапред ќе бидат опфатени повозрасните лица, хронично болните, здравствените работници и останатите категории со зголемен ризик од компликации предизвикани од сезонскиот грип.
Од здравствените власти истакнуваат дека навремената набавка на првите 30.000 вакцини овозможува имунизацијата да започне без одложување, додека дополнителните испораки ќе обезбедат доволно дози за проширување на опфатот.
„Работиме да обезбедиме до 80.000 дози. Најважно беше да пристигнат првите 30.000 вакцини за веднаш да започнеме со имунизација на најризичните групи. Следните 26.000 дози се очекуваат до 15 ноември, а во меѓувреме продолжуваме со активности за обезбедување на преостанатите количини“, велат надлежните.
Здравствените институции повторно апелираат граѓаните кои припаѓаат на ризичните категории навреме да се пријават за вакцинација, бидејќи имунизацијата останува најефикасната заштита од потешки форми на сезонски грип и можните компликации.
