Обвинителството за организиран криминал и корупција со месеци чека одговори и докази од Министерството за внатрешни работи во врска со случајот што се однесува на сомнежи за оддавање службени тајни и можни шпионски активности во Кабинетот на претседателката Гордана Сиљановска-Давкова.
Предистражната постапка била отворена уште на 18 декември 2025 година, по известување од Секторот за компјутерски криминал при МВР, а се однесувала на настан од 24 ноември истата година и, како што наведуваат од Обвинителството, „индиции за недозволени активности од висок државен интерес“.
Во рамки на постапката, обвинителството веднаш побарало судска наредба за увид и проверка на информативниот систем во Кабинетот на претседателката, со цел да се утврди дали имало неовластено копирање, извлекување или пренесување на доверливи податоци.
Истражителите одзеле компјутери и лаптопи од кабинетот, кои потоа биле предадени на МВР за вештачење и анализа. Паралелно, биле побарани и снимки од безбедносните камери за периодот кога се случил спорниот настан, со цел да се утврди кој имал пристап до системот и дали биле изнесувани чувствителни информации.
На 30 декември 2025 година била испратена и официјална наредба до Секторот за компјутерски криминал за анализа на извлечените електронски податоци.
Сепак, истрагата се соочила со дополнителни проблеми откако Кабинетот на претседателката го известил обвинителството дека не располага со копии од видео надзорот. Од таму посочиле дека системот бил набавен преку Службата за општи и заеднички работи, додека со снимките управувало МВР.
Потоа обвинителството се обратило и до СОЗР и до Министерството за внатрешни работи со барање за итно обезбедување на снимките. Од СОЗР одговориле дека нивната улога била само набавка на опремата, а не и чување на видео материјалите.
Според информациите од Обвинителството, МВР до денес не доставило ниту снимки, ниту информација дали се преземени конкретни активности за нивно обезбедување.
Во март годинава, МВР испратило само делумен извештај поврзан со пристап до криптирани податоци од компјутерската опрема. Во меѓувреме, до обвинителството биле доставени и два мобилни телефона одземени од вработен во Кабинетот на претседателката, кој раководел со информатичкото одделение.
По тоа, обвинителката Катерина Коларевиќ наредила дополнителна анализа на телефоните, како и споредба на податоците од нив со материјалите извлечени од компјутерите.
На 25 март 2026 година била испратена нова наредба до МВР за детална анализа на сите електронски податоци и за проверка како е постапено по судската наредба за увид во информативниот систем.
Но, и покрај сериозноста на случајот и можните безбедносни импликации, од Обвинителството велат дека сè уште немаат добиено конечни извештаи, ниту комплетни докази од Министерството за внатрешни работи.
