Основното јавно обвинителство Скопје поднесе обвиненија против шест лица и предложи издавање казнен налог за уште 33 лица, осомничени дека биле дел од организирана шема за злоупотреба на лични податоци, фалсификување документи и компјутерски измами преку подигнување брзи кредити.
Според Обвинителството, обвинетите во повеќе наврати, координирано и со однапред утврдени улоги, внесувале лажни податоци во информатичките системи на финансиски друштва. При тоа користеле фалсификувани документи и злоупотребени лични податоци на граѓани за да подигнат брзи кредити на нивно име.
Во шемата, според истрагата, учествувал и службеник од Фондот за здравствено осигурување, кој им обезбедувал ЕЗБО броеви преку електронскиот систем на институцијата, со што им го олеснувал реализирањето на измамите.
Истрагата покажала дека четворица од обвинетите во периодот од февруари 2023 до јуни 2024 година незаконски стекнале имотна корист од 2.509.808 денари. Останатите осомничени, во текот на 2022 и 2023 година, прибавиле дополнителни 659.500 денари, со што вкупната противправно стекната корист надминала 3,1 милион денари.
За четири лица кои првично биле опфатени со истрагата, јавниот обвинител ја запрел постапката. За двајца не биле обезбедени доволно докази за нивна вмешаност, додека двајца починале во текот на истражната постапка.
Предметот продолжува пред надлежниот суд, каде обвинетите ќе одговараат за продолжени кривични дела – фалсификување исправа, злоупотреба на лични податоци и компјутерска измама.
