Унгарскиот премиер Петер Маѓар најави драстично намалување на платите на политичарите и функционерите во земјата, порачајќи дека политичката елита мора да покаже поголема скромност во време на економски предизвици.
Во интервју за RTL, Маѓар изјави дека неговата месечна плата ќе изнесува 3,8 милиони форинти, што е помалку од половина од последната позната плата на поранешниот премиер Виктор Орбан.
Според најавените мерки, ќе бидат намалени платите на министрите, пратениците, градоначалниците, како и на раководствата на државните компании и членовите на надзорните и советодавните тела.
Маѓар објасни дека неговата плата ќе се состои од премиерска плата од 2,3 милиони форинти и стандардна пратеничка плата од 1,5 милиони форинти.
Според унгарскиот портал „Pénzcentrum“, платата на Виктор Орбан оваа година достигнала околу 7,8 милиони форинти месечно, што е повеќе од десет пати над просечната бруто плата во Унгарија.
Покрај намалувањето на платите, владата планира и ограничување на парламентарните надоместоци. Маѓар посочи дека досега пратениците можеле да побаруваат и до седум милиони форинти месечно за трошоци за гориво, сместување и персонал, додека новото ограничување ќе биде под пет милиони форинти.
Тој оцени дека досегашниот систем овозможувал јавни средства индиректно да завршуваат кај структури поврзани со партијата Фидес на Орбан.
„Важно е каков пример даваме за унгарските граѓани и во странство“, изјави Маѓар, додавајќи дека политичарите мора да покажат одговорност и умереност.
Според неговите проценки, само со намалувањата во парламентот би можеле да се заштедат околу 50 милијарди форинти.
Владата најави и построги правила за користење дипломатски пасоши, како и ограничувања за употребата на сини ротирачки светла на службените возила.
