Бугарија доби нова влада, но реториката кон Македонија остана старата – негаторска. Последната средба меѓу министрите за надворешни работи само го потврди тоа, придружена со ново понижување од Софија. Бугарската министерка, иако добро знае кои сме ние Македонците, без задршка го употребила терминот „северномакедонски партнери”.
Македонскиот министер Тимчо Муцунски реагираше остро дека овој термин е неприфатлив и навредлив за македонскиот идентитет. Но, дали Софија ќе запре со провокациите и негирањата или пак сега е дополнително охрабрена откако СДСМ и нивниот лидер Венко Филипче се за удоволување на некои барања на Бугарија?
Единството во Бугарија по македонското прашање е видливо, но не е видлива ниту реакцијата на Филипче за софискиот назив „северномакедонци”? Зошто СДСМ не е така грлат како што е овие денови дека треба да се смени уставот што го наметнува источниот сосед?
Зошто сега се тивки и Димитар Ковачевски и Бојан Маричиќ, кои во 2022 година уверуваа дека преговарачката рамка го „бетонира” идентитетот. Каде се сега да објаснат или пак реагираат до Софија зошто „гарантираниот” идентитет ни го чепкаат?
Очигледно е дека на Бугарија и годи ваквото однесување на дел од македоnската опозиција. Затоа прашањето веќе не е дали ќе има позитивни ветришта од новата влада во Софија, туку дали СДСМ ќе се подосвести дека погрешно се бори за гласови и почеток на преговори со ЕУ – кои преговори патем не убедуваа дека се започнати пред неколку години.
