На Клиниката за инфективни болести во изминатите 24 часа е хоспитализиран уште еден 76-годишен пациент со сомнение за невроинвазивна форма на западнонилска треска. Кај него е потврдено воспаление на мозокот и мозочните обвивки од вирусно потекло, а серолошките анализи покажале присуство на вирусот Западен Нил.
Со новопримениот пациент, бројот на клинички сомнителни случаи се искачи на седум, додека кај 10 пациенти веќе е лабораториски потврдена западнонилска треска. Тројца од нив се во критична состојба, сместени на Одделот за интензивна нега и приклучени на механичка вентилација. Според лекарите, нивната здравствена состојба засега е непроменета. Сите пациенти се од Скопје.
Директорот на Клиниката за инфективни болести, д-р Фадил Цана, информира дека за конечно потврдување на невроинвазивната форма на болеста кај најновиот пациент се потребни дополнителни анализи на цереброспиналната течност.
Тој појасни дека ПЦР-тестот не претставува златен стандард за дијагностицирање на оваа форма на болеста, поради што се спроведуваат дополнителни лабораториски испитувања, а пациентите се третираат како заболени од вирусот Западен Нил.
Д-р Цана потсети дека инкубацијата може да трае до 14 дена и дека текот на болеста не може однапред да се предвиди. Најголем ризик од тешка клиничка слика имаат лицата постари од 60 години, хронично болните и оние со ослабен имунитет. Кај околу 80 проценти од заразените, инфекцијата поминува со благи симптоми или целосно без симптоми.
