Во моментов низ Македонија се реализираат околу 1.200 инфраструктурни проекти со поддршка на Владата, изјави вицепремиерот и министер за транспорт Александар Николоски. Тој посочи дека целта е да се подобри локалната инфраструктура и директно да се олесни секојдневниот живот на граѓаните.
Според Николоски, Владата најпрво се фокусирала на улици, водоводи, канализации, тротоари, градинки, училишта и здравствени установи, а паралелно ги реализира и големите државни инфраструктурни проекти. Тој оцени дека поволните кредитни линии за стопанството поттикнале инвестициски циклус вреден најмалку 750 милиони евра во приватниот сектор.
Николоски нагласи дека во државата во моментов истовремено се градат шест автопати, што, според него, е прв случај во Македонија и регионот. За автопатот Скопје–Блаце рече дека е обезбеден грант од околу 31 милион евра, а за изведувач е избрана компанијата „Гранит“. За автопатот Кичево–Охрид информираше дека досега се изградени 37 километри, од кои 34 километри веќе се пуштени во сообраќај, а летово ќе бидат отворени и нови делници. Според него, градежните работи на автопатот Гостивар–Букојчани се одвиваат подобро од очекувањата, а веќе се пробиени 17 од вкупно 31 километар.
Николоски најави дека во следните десетина дена се очекува избор на изведувач за делницата Букојчани–Кичево, која ќе се реализира со поддршка од Европската банка за обнова и развој. За автопатот Битола–Прилеп рече дека е најдолгиот проект што моментално се гради и очекува првите 10 до 11 километри да бидат пуштени во употреба во првата половина на следната година.
Министерот оцени дека динамиката на сите автопатски проекти е добра и дека во следните години Македонија ќе добие значително подобрена патна инфраструктура. Николоски порача дека ваков обем на истовремена изградба на автопати досега не бил забележан ниту во Македонија, ниту во регионот.
